Nanawagan ang Commission on Elections kon (COMELEC) sa kamarabaha nga siguraduhong klaro ug daling ipatuman ang itukod nga balaod mahitungod sa Anti-Political Dynasty.
Sa exclusibong pakighinabi sa Bombo Radyo kay COMELEC Chairman George Erwin Garcia nga angayang mahisgutan kini sa kamara aron masiguro nga makaapas ang maong balaod sa umaabot nga election.
Saysay pa niini nga dili angay hatagan og sobra nga kagawasan ang komisyon sa pag-interpret sa balaod aron malikayan ang kalibog ug dili patas nga pagpatuman.
Gipasabot usab niini nga kon dili dayon mapasa ang sugyot balaodnon, dako ang kahigayonan nga maapektuhan ang pagpangandam alang sa 2028 Presidential Elections tungod kay magsugod na ang filing sa candidacy sa sunod tuig.
Gikabalak-an usab ni Garcia ang posibleng mga loopholes kon dili maayo ang pagkahimo sa balaod. Lakip sa iyang gihangyo nga maklaro mao ang proseso sa disqualification o cancellation sa candidacy sa mga makalapas niini kon ipatuman ba kini sa dili pa o human na ang eleksyon. Matud sa opisyal, usa kini ka “political question” nga dapat tubagon sa Kongreso aron masiguro ang patas nga dula sa politika sa nasud.