Gilaoman karon sa Commission on Elections kon Comelec sa syudad sa Malaybalay ang usa ka dakong kausaban sa dagan sa lokal nga politika, hilabina tungod sa nagkadugang nga pakiglamigit ug interes sa mga kabatan-onan sa mga isyu sa panggobyerno ug eleksyon.
Sa pakighinabi sa Bombo Radyo Malaybalay kang Atty. Danilo N. Dividina, Election Officer sa Comelec-Malaybalay City, gipadayag niini nga base sa personal nga obserbasyon, klaro ang pag-uswag sa kahibalo ug kahandurawan sa mga kabatan-onan sa katungdanan isip botante.
Samtang, gibutyag niini nga sa pagkakaron, limitado pa ang ihap sa mga nakarehistro alang sa piniliay nga ipahigayon sa Nobyembre 2, 2026.
Apan gilaoman sa Comelec nga mudagsa ang rehistrasyon sa mga botante sa umaabot nga mga bulan, hilabi na sa Abril ug Mayo, tungod bakasyon na sa kadaghanang estudyante ug mas aduna na higayon nga moadto sa buhatan sa Comelec aron magparehistro.
Gipahinumduman usab ni Atty. Dividin,a nga ang mga opisyales nga madaog sa umaabot nga eleksyon mag-alagad sulod sa upat ka tuig nga termino, hinungdan nga importante ang husto ug responsableng pagpili sa mga lider.
Ang maong rehistrasyon sakop niini ang tanang proseso sama sa pagparehistro sa bag-ong botante, pagbalhin sa rehistrasyon, pagpaayo sa personal nga rekord, ug reactivation sa mga natanggong rehistrasyon.