Gibutyag sa Commission on Elections (COMELEC) nga adunay siyam (9) ka mga contractors nga naghatag og campaign donations sa pipila ka kandidato sa 2025 midterm elections.
Sumala ni COMELEC Chairman George Garcia, wala pa nila nakumpirmar kung kinsa sa mga kandidato ang nakadawat sa maong donasyon kon kini ba nakadaog o napildi.Apan giklaro niini nga ang nahilambigit sa maong isyu mao ang siyam ka contractors base sa ilang inisyal nga imbestigasyon.
Nagpadayon pa karon ang COMELEC sa ilang pagbasa ug pagsusi sa mga Statements of Contributions and Expenditures (SOCE) nga gisumite sa 66 ka senatorial candidates ug 155 ka party list groups.
Gikatakda usab nga ihatag sa COMELEC ang final nga listahan sa mga contractors ngadto sa Department of Public Works and Highways (DPWH) aron kini usab masuta ang legal nga epekto sa ilang gihimong donasyon.
Sumala sa Omnibus Election Code, bawal sa tanang kandidato nga modawat og donasyon gikan sa mga contractors nga adunay kasamtangang kontrata sa gobyerno tungod kay kini posibleng mosangpot sa conflict of interest ug pamulitika. Padayon pa ang imbestigasyon sa maong isyu ug gilauman nga ipasundayag kini sa publiko human sa koordinasyon sa ubang ahensya sa gobyerno