Gipadayag ni Leila de Lima, representante sa Mamamayang Liberal Party-list, nga nagkagamay na ang kalibutan sa mga giingong co-perpetrator ni kanhing Pangulong Rodrigo Duterte human sila mapangalanan sa International Criminal Court (ICC).
Lakip sa mga gihisgutan mao sila Ronald “Bato” dela Rosa, Bong Go, kanhi Justice Secretary Vitaliano Aguirre II, ug uban pang mga opisyal sa Philippine National Police.
Sa usa ka video statement nga gipagawas ni De Lima nga dugay na niya silang gipahimangnoan, bisan pa sa panahon nga siya anaa sa prisohan, nga moabot ang maong higayon.
Matud ni De Lima , sama sa kanhing pangulo, wala sila maminaw ug nagpakita pa og garbo.
Nagpasidaan usab si De Lima nga posible nga ang uban kanila motago aron malikayan ang responsibilidad, apan bisan unsa pa ang mahitabo, giingon niya nga padayon silang gukdon sa hustisya ug mapatigbabaw ang hustisya.
Base sa dokumento nga gipagawas sa ICC, ang pagkalip nila Dela Rosa ug Go sa listahan may kalabotan sa ilang papel sa pagpatuman ug pagsuporta sa mga polisiya sa drug war ni kanhing Pangulong Duterte.
Kahinumduman nga si Dela Rosa kaniadto nagsilbi isip hepe sa pambansang pulisya nga nanguna sa kampanya batok sa iligal nga droga, samtang si Go nagsilbi isip Special Assistant to the President (SAP).