Gipugngan sa City Traffic Management Center (TMC) sa Malabalay ang pagpatuman sa traffic lights sa downtown area tungod sa kahimtangan sa mga dalan ug sa pagkaduol-duol sa mga intersections.
Sa pakighinabi sa Bombo Radyo Malaybalay, matod sa Traffic Operations Officer I nga si Justino Roy Bayo Santonino, bisan pa sa pagtubo sa ekonomiya sa syudad ug sa mga sugyot gikan sa katawhan, mas episyente gihapon sa pagkakaron ang manual traffic operations kaysa automated traffic lights.
Iyang gipatin-aw nga bisan pa og adunay takdang oras ang traffic lights, kung walay sakyanan sa usa ka lane, mapugos gihapon og hulat ang ubang motorista, nga mosangpot sa hinay nga agos sa trapiko.
Dugang pa niini nga kon magbutang og traffic lights sa downtown, limitado ra kini sa sentrong bahin sama sa New Mercury, Moreno Street, ug Gaisano, ug dili na tugotan ang left turn kay makadugang kini sa congestion ug magpugos sa mga sakyanan nga maglibot imbis nga diretso nga makaagi.
Sa pagkakaron, padayon pa usab nga gi-evaluate sa city government ang lain-laing traffic solutions aron mapadali ang agos sa trapiko ug malikayan ang congestion sa downtown area sa Malabalay.