Giklaro ni Malaybalay City Mayor Atty Jay Warren Pabillaran nga lisod para sa lokal nga kagamhanan ang manginlabot sa joint venture tali sa Malaybalay City Water District (MCWD) ug PrimeWater.
Bisan pa, andam ang siyudad nga motabang sa pag-ila sa mga lugar nga hinay o walay agas sa tubig.Sumala sa mayor, prioridad sa lokal nga kagamhanan ang pagtabang sa pagbutang og mga reservoir o reserbang tangke sa mga lugar nga daghan og populasyon apan way igong suplay sa tubig, partikular sa poblasyon area ug sa parte sa Landing, Casisang.
Gipahibalo usab ni Mayor Pabillaran nga mitambong siya sa miting uban sa MCWD ug PrimeWater gahapong adlawa. Usa sa mga lakang nga ilang gihisgutan mao ang posibilidad sa pagbutang og bakhoe pipeline aron mapadali ang pag-abot sa tubig sa mga lugar nga nanginahanglan niini.