Giduso ni City Councilor Rendon Sangalang ang usa ka ordinansa nga nagdili sa mga motorcycle endurance events sa tanang pampublikong dalan sa siyudad aron maseguro ang kaluwasan sa mga molupyo ug uban pang naggamit sa dalan.
Sa gipahigayon nga session kagahapon, gipadayag ni Sangalang ang iyang kabalaka sa Boss Ironman Motorcycle Challenge miresulta sa daghang disgrasya.
Ubos sa maong ordinansa, ang mga mosupak mag-atubang sa mosunod nga mga silot. Multa nga P5,000, 10 ka adlaw nga pagkapreso ug pag-impound sa motorsiklo nga gigamit sa maong event.
Gikutlo usab sa konsehal ang datos gikan sa Philippine Statistics Authority (PSA) nga nagpakita sa makapaalarma nga pagsaka sa mga aksidente sa motor sa tibuok nasud.
Dugang pa niini, gipasabot sa konsehal nga kon ugaling mangayo og permiso ang mga organizers sa Probinsya aron muagi sa siyudad, posibleng mabag-o ang pagpatuman sa ordinansa. Apan giklaro niini nga bisan pa man og naay pagtugot gikan sa Probinsya, kinahanglan gihapon nga tumanon sa mga motorista ang tanang traffic rules sa dakbayan.