Gitutokan sa Criminal Investigation and Detection Group (CIDG) Bukidnon ang kampanya batok sa tanang matang sa kriminalidad sa tibuok probinsya ubos sa nagkadaiyang mga programa.
Sa pakighinabi sa Bombo Radyo Malaybalay kang Julie Mae Cabigon, ang investigator sa Women and Children Protection Desk sa CIDG Bukidnon, gipadayag niini nga padayon ang ilang agresibong operasyon pinaagi sa “Oplan Manhunt” batok sa mga wanted person ug “Oplan Bolilyo” nga nagtarget sa mga illegal numbers games.
Sa unang semana sa bulan sa Abril, malampuson na ang ilang mga operasyon batok sa ilegal nga sugal sa Valencia City ug Dangcagan, dungan sa pagsikop sa mga tawo nga adunay pending warrant of arrest sa nagkadaiyang dapit.
Samtang s abulan sa Marso, nakatala ang buhatan og kinatibuk-ang 15 ka malampusong operasyon, lakip na niini ang pagsikop sa siyam ka wanted nga mga indibidwal, lima ka operasyon batok sa illegal gambling, ug usa ka operasyon batok sa “tare-tare” diin unom ka suspetsado ang nadakpan.
Gipasalig sa CIDG-Bukidnon nga padayon gihapon ang ilang pagmonitor ug pagpatuman sa balaod aron masiguro ang kalinaw ug kahapsay sa probinsya, dungan sa panawagan sa publiko nga padayong mokooperar sa mga awtoridad aron masumpo ang bisan unsang ilegal nga kalihokan.