Naglunsad ang Cybercrime Investigation and Coordinating Center kon CICC og bag-ong kampanya batok sa mga dili rehistradong online lending platforms, human misaka ang ihap sa mga Pilipinong nabiktima sa illegal nga pautang sa internet.
Gikan Enero hangtod Pebrero, nakadawat ang CICC og dul-an 600 ka reklamo, mas taas tandi sa susamang panahon kaniadtong 2025.
Sumala ni Executive Director Renato “Aboy” Paraiso, daghan pa ang kaso nga wala na-report.
Gipahimangno sa CICC nga daghang scam apps ang naggamit og promosyon nga direkta nagdala sa website imbis nga lehitimong app, nga adunay auto-collection features, ug makakuha kini og access sa social media ug contact list sa biktima aron sa pagpanghadlok ug harassment.
Gipasidan-an usab ang publiko nga mag-amping sa mga pautang nga ubos ang interes apan adunay hidden charges; sumala sa SEC, dili molapas sa 15% matag tuig ang kinatibuk-ang bayronon.
Nagkahiusa usab ang CICC sa PNP Anti-Cybercrime Group ug NBI aron dakpon ang mga sindikato nga nagpadagan sa scam bisan pa man kung naa sa gawas sa nasud ang operasyon.
Kasagaran gamiton sa mga abusadong kolektor ang Telegram, apan miuyon na kini sa pakigtambayayong sa otoridad.