Girekomenda ni kanhing Supreme Court Senior Associate Justice Antonio Carpio nga magpahigayon og serye sa mga debate tali kaniya ug ni Sen. Rodante Marcoleta bahin sa West Philippine Sea (WPS).
Kini gisunod sa sugyot ni Marcoleta nga himoon nga bukas ang debate sa legal, historical, ug geopolitical nga aspeto sa West Philippine Sea (WPS), nga mas halapad kumpara sa suhestiyon ni Carpio nga limitahan una ang diskusyon sa kung adunay ba gyud WPS ubos sa balaod sa Pilipinas ug kung sakop ba sa teritoryo sa nasud ang mga maritime feature niini.
Sa panayam sa Bombo Radyo Philippines, giingon ni Justice Carpio nga sobra ka halapad ang sakop sa pahayag ni Marcoleta.
Matud ni Carpio nga kung gusto sa bag-ong senador, mahimo nila kini buhaton sa daghang higayon aron mahisgutan ang tanang anggulo bahin sa gipanag-iyahan nga kadagatan.
Apan, sa unang debate, kinahanglan unahon paghisgot kung aduna bay West Philippine Sea (WPS) ubos sa balaod sa nasud.
Gibarugan usab sa kanhing mahistrado nga kinahanglan adunay opisyal nga ‘parameter’ ang debate ug dili lang basta-basta depende sa gusto nilang hisgutan.
Human sa unang debate ug masuta ang legal foundation sa WPS, mahimo na unta pagpili ni Marcoleta sa iyang gustong hisgutanan bahin sa West Philippine Sea (WPS).
Gihisgutan usab ni ang kaibahan sa territorial disputes ug maritime rights: ang territorial dispute mao ang pag-angkon sa mga isla o bato sa ibabaw sa tubig, samtang ang maritime dispute nagtan-aw sa sakop sa Exclusive Economic Zone (EEZ) ug maritime entitlements..
Gidugang pa ni Carpio nga sayop ang pagatuo ni Marcoleta nga wala tay West Philippine Sea o wala tay katungod sa EEZ gawas sa 200 nautical mile limit.