Gikabalak-an sa publiko ang suplay sa kuryente sa panahon sa piniliay.
Apan, sa pagpakighinabi sa Bombo Radyo Malaybalay news, kang Christopher Dulfo, BUSECO general manager, gisiguro niini nga anaay saktong suplay sa kuryente ug walay pagkabalda sa serbisyo niini atol sa piniliay.
Dugang pa niini, mipagawas na sila og mga pahimangno sa katawhan alang sa mga dili angay pagabuhaton aron malikayan ang bisan unsang pagkaputol sa linya sa kuryente.
Gibutyag usab niini nga dunay mga aktibidad ang National Grid Corporation of the Philippines nga gisuspendi alang sa eleksiyon.
Lakip sa mga aktibidad nga gisuspendi ang mga electric maintenance ug pag-usab sa iskedyul niini.
Miluwat usab si Dulfo sa contingency plan sa ahensya, ug lakip niini ang mga nakaistambay nga task force hilabi na sa mga lagyong dapit.
Matod pa niini, 24/7 sila nakamonitor uban sa Department of Energy.
Gipahimangnoan usab niini ang katawhan nga maglikay sa pagbuhat og mga aktibidad nga makaapekto sa kuryenti, sama sa pagputol og mga kahoy ug gisaysay niini nga bisag gagmay nga pagputol sanga, makaapekto na kini sa linya sa kuryente nga posibleng hinungdan sa pagkapalong niini.