Apektado ang daghang residente human subling mibusikad sa makusog nga higayon ang Bulkang Kanlaon sa Negros Oriental.
Gani, gumikan sa maong panghitabo, daghanang mga dalan ug propedad ang natabunan og baga nga asupre. Gibutyag sa Philippine Institute of Volcanology and Seismology (PHIVOLCS), nibusikad ang bulkan banda alas 2:55 sa kaadlawon ning adlawa, Mayo 13 ning tuiga,human ang adlaw sa eleksyon.
Sumala sa PHIVOLCS, alas 4:30 sa buntag, gi-report sa mga state seismologists nga milungtad og lima ka minutos ang pagbusikad base sa seismic ug infrasound data, diin mibuga kini kini og abo nga dunay volumen nga misaka hangtod 3,000 ka metros gikan sa bungbong sa bulkan paingon sa kasadpang bahin sa naasoyng lugar.Gikumpirma sa PHIVOLCS nga adunay 17 ka pagtay-og na ang natala nga may kalabutan sa maong pagbusikad lakip na ang tulo ka tremor nga milungtad og 6 hangtod 96 ka minutos.
Nasuta usab nga niabot sa 5,222 ka tonelada matag adlaw ang sulfur dioxide nga gipagawas sa bulkan, mas taas kini tandi sa naunang rekord niadtong Enero.
Gipahibalo sa ahensya nga gipailawom sa Alert Level 3 ang Kanlaon nga nagpasabot nga adunay posibilidad nga duna pay laing pagbusikad ang mahitabo. Gi-awhag ang mga lumolupyo nga nakapuyo sa sulod sa 6-kilometro nga permanent danger zone nga muhikling ug magmatngon kanunay.
Sa pagkakaron, wala pay nartala nga samaran o nadaot nga mga estruktura, apan nagpabilin ang hulga sa sunod-sunod nga kalihokan sa maong bulkan.
Kasamtangang nagpadayon ang pagbantay sa mga otoridad aron maseguro ang kaluwasan sa tanan.