Nagpabiling mabalak-on ang mga awtoridad human makatala ang PHIVOLCS og dul-an sa tulo ka gatos nga volcanic earthquakes ug kapin upat ka gatos nga rockfall events sa Bulkang Mayon karong adlawa, Marso 18.
Base sa pinakaulahing monitoring sa PHIVOLCS karong Miyerkules, nitala ang bulkan og eksaktong 287 ka volcanic earthquakes ug 444 ka rockfall events sa sulod lamang sa usa ka adlaw.
Gawas sa mga pagtay-og, namatikdan usab ang 20 ka pyroclastic density current (PDC) signal.
Naitala usab ang padayon nga lava effusion gikan sa crater sa maong bulkan. Gipahibalo sa PHIVOLCS nga nagpabilin ang Alert Level 3 status sa Mayon.
Hugot nga gipahimangnoan ang publiko nga likayan ang pagsulod sa 6-kilometer radius Permanent Danger Zone (PDZ) aron malikayan ang bisan unsang disgrasya gikan sa kalit nga pagbuto, pagdahili sa bato, ug uban pang hulga sa bulkan.