Gilaoman nga adunay mosunod nga mga rally sa probinsya sa Bukidnon isip padayon nga pagpadayag sa mulo batok sa korapsyon.
Sa eksklusibong pakighinabi sa Bombo Radyo Malaybalay sa event organizer sa Bukidnon nga si Allan Lumansang Cuaresma, gibutyag niini nga kasamtangan nga giplanohan ang dugang nga mga lakang ug ang sunod nga hugna sa rally, nga gikatakdang musubay gihapon sa dagan sa nasyonal nga kalihokan.
Apan giklaro niini, nga lahi ang rally sa probinsya tandi sa mga rally sa nasyonal tungod hapsay ug malinawon ang unang rally nga gipahigayon niadtong Septyembre 21, 2025 sa Dakbayan sa Valencia.
Gikataho nga anaa sa gibanabana nga kapin 500 ka mga protestante gikan sa lain-laing lugar sa Bukidnon, lakip ang Valencia ug Malaybalay City, Maramag ug San Fernando.
Matud sa organizer, gitinguha sa mga mitambong nga protestante ang tinuod nga reporma sa gobyerno.
Dugang pa niini, nga kung dili matagaan og pagtagad ang ilang mga mulo, mas maayo matud pa nga muresign na si Presidente Ferdinand “Bongbong” Marcos Jr. ug ipuli si Bise Presidente Sara Duterte.
Miluwat usab si Cuaresma, nga sa tulo ka tuig nga paglingkod sa kasamtangang administrasyon, wala pa sila makasinati og lig-on nga programa ug serbisyong tinud-anay alang sa katawhan.