Padayon ang Solar Home System Program sa gobyerno pinaagi sa Photovoltaic Mainstreaming Program sa Bukidnon Second Electric Cooperative kon BUSECO aron mahatagan og kuryente ang mga hilit nga mga sitio ug barangay sa lalawigan sa Bukidnon.
Sa eksklusibong pakighinabi sa Bombo Radyo Malaybalay kang Rey-Ann A. Baul, Department Manager sa Engineering and Technical Services sa BUSECO, gipdayag niini nga aktibo gihapon ang programa karong 2026 ug magpadayon hangtod 2028.
Matud pa niini, programa gipundohan sa European Union ug ginadumala sa National Power Corporation ug Department of Energy, nga nagtumong sa total electrification.
Gipasabot niini nga matag benepisyaryo gahatagan og 50-watt Solar Home System, libre ang suga ug installation, apan nagkinahanglan og card nga ginapaload aron molihok ang baterya.
Gibutyag niini nga ang imposed rate mokabat og kapin sa P2,300, ug target nga mapalapdan pa ngadto sa 3,000 ka benepisyaryo.
Samtang sa laing bahin, gipasabot usab ang kalainan sa scheduled ug unscheduled power interruptions gumikan sa kasagarang mulo sa katawhan diin matud pa nga ang scheduled ginapahibalo daan, samtang ang unscheduled resulta sa dili kontrolado nga kahimtangan.
Samtang kabahin bayranan sa kuryente giklaro nga nagdepende sa konsumo, hilabi na sa gidaghanon sa mga appliances ug gadgets nga nakasaksak ug nagkonsumo og kuryente.