Gipasalig ni Mayor Jay Warren R. Pabillaran ang hugot nga pagpangandam sa dakbayan alang sa umaabot nga Northern Mindanao Regional Athletic Association kon (NMRAA) 2026, ilabi na ang pagtubag sa mga batakang panginahanglanon sa mga atleta.
Sumala sa Mayor, gihisgutan na sa Technical Working Group (TWG) ang mga protocol sa seguridad ug kaluwasan aron masiguro ang hapsay nga dagan sa mga programa.
Usa sa mga nag-unang gituki mao ang suplay sa tubig, dungan sa obserbasyon nga adunay nasinati nga pagkapalong-palong sa serbisyo sa panubig sa pipila ka dapit ug safety measures sa mga establisiyemto nga temporaryong puluy-an sa mga deligado gikan sa nagkalain-laing lugar sa rehiyon.
Dugang pa sa Mayor mokabat sa 16 ka mga eskwelahan sa dakbayan sa Malaybalay ang gipili silbing billeting quarters alang sa mga partisipante sa umaabot nga kompetisyon nga gikatakdang ipahigayon karong Marso 18 hangtod 24.
Kini nga mga tunghaan maoy mu-accomodate sa mga atleta ug opisyales gikan sa nagkalain-laing dibisyon nga mosalmot sa maong kalihokan.
Isip kabahin sa preparasyon, ang mga mayor ug ilang mga representante nagpahigayon na og mga tigom alang sa dugang hisgutanan.