Padayon ang manhunt operation sa kapulisan batok sa usa ka person of interest sa brutal nga pagpatay sa usa ka menor-de-edad nga babaye nga gipugotan og ulo sa Purok 1, Sitio Sinait, Barangay Dagatkidavao, Valencia City, Bukidnon.
Sa eksklusibong pakighinabi sa Bombo Radyo Malaybalay kang PCpt. Sheila Joy P. Jangad, tigpamaba sa Bukidnon Police Provincial Office, gipadayag niini nga aduna nay giila nga person of interest ug aktibong gipangita kini sa nagkadaiyang bahin sa syudad.
Miluwat usab kini nga adunay pipila ka indibidwal nga mitumaw nga mahimong testigo sa maong kaso.
Dugang pa sa tigpamaba, nga mitanyag ang lokal nga kagamhanan sa Valencia City og P200,000 nga ganti alang sa bisan kinsang makahatag impormasyon nga mosangpot sa pagdakop sa suspek.
Base sa impormasyon nga nakalap gikan kang Bise-Mayor Cecile Galario, sa dakbayan sa Valencia, pasado alas 8:00 sa kagabii sa Enero 9, 2026, gipahigayon ang usa ka manhunt operation sa Sitio Buco, Barangay Dagatkidavao, diin gituohang anaa ang suspek.
Matud pa, miresulta ang operasyon sa usa ka engkwentro human gikaingong nanigbas ang suspek atol sa pag-intercept sa mga otoridad.
Padayon pa ang imbestigasyon sa kapulisan aron masuta ang tanang detalye sa nahitabo ug masiguro ang pagkasikop sa suspek alang sa paghatag hustisya sa biktima.