Nasikop sa otoridad ang duha ka pares sa magsuon sa duha ka lahi-lahi nga operasyon sa Bukidnon human masakpi nga nagbaligya sa gituohang shabu sa dakbayan sa Malaybalay ug Valencia Bukidnon.
Nasulod sa pukot sa City Drug Enforcement Unit (CDEU)-Malaybalay ang duha ka magsuong lalaki atol sa gikasa nga drug buy-bust operation sa Purok 3B, Barangay Aglayan, Malaybalay City pasado alas 2:32 sa hapon.
Ang mga suspek giilang sila si alyas Ronel, 32 anyos, walay trabaho, residente sa Barangay Bugcaon, Lantapan, ug alyas Dodong, 24 anyos, construction worker, residente sa Barangay Lumbo, Valencia City.
Napalitan ang mga suspek ug gituohang shabu nga nagkantidad sa ₱500, samtang sa body search narekober kang Ronel ang lima ka sachet sa gituohang shabu nga gibana-banang 15 gramos ug nagkantidad sa ₱102,000, ug kang Dodong ang ₱500 buy-bust money.
Sa laing bahin, nasikop usab sa Provincial Drug Enforcement Unit (PDEU)-Bukidnon ang duha ka magsuong babaye nga taga Lanao del Sur atol sa buy-bust operation sa Purok 3, Barangay Lumbo, Valencia City, pasado alas 6:55 sa gabii sa maong petsa.
Giila ang mga suspek nga sila si alyas Jam, 21 anyos, minyo, walay trabaho, ug alyas Lila, 30 anyos, mag-uuma, nga parehong residente sa Lanao del Sur.
Gipangitaan kini og kapin 35.5 gramos nga gituohang shabu nga may estimated market value nga ₱241,400, lakip na ang buy-bust money ug duha ka cellphone nga gigamit sa transaksiyon.
Sa karon, ang tanang mga dinakpan anaa na sa kustodiya sa kapulisan sa Malaybalay ug Valencia City Police Station alang sa hustong disposasyon.