Nanghinaot ang Board of Directors sa Malaybalay City Water District kon MCWD nga magbulontaryo nga musurender ang PrimeWater Infrastructure.
Sa eksklusibong pakighinabi sa Bombo Radyo Malaybalay kang Engr. Jorge C. Lagumbay, Chairperson sa Board of Directors sa MCWD, nga ang labing maayo nga buhaton sa PrimeWater Infrastructure mao ang pag-bulontaryo pagsurender gumikan sa wala pagtuman sa joint venture agreement.
Matud ni Lagumbay, kini aron maturn-over sa Water District ang operasyon ug masugdan gilayon ang mga lakang alang sa paghatag og hustong serbisyo sa panubig sa kabalayan ning syudad sa Malaybalay.
Gibutyag ni Lagumbay, nga mipagawas og resolusyon alang sa dugang 90-days pre-termination notice batok sa PrimeWater tungod sa kapakyasan sa pagtuman sa kasabutan.
Una na niini ang gipahamtang nga 60-day ultimatum diin natapos kaniadtong Agosto 26 apan wala kini masunod sa PrimeWater, hinungdan nga misunod na ang 90-day pre-termination period.
Dugang pa niini, nga kung dili musanong ang mutual agreement, musulod na ang arbitration process ug hisgutan na usab sa BOD ang mga musunod nga lakang.
Samtang sumala pa ni Lagumbay, nga sa gisaad nga P500 milyon nga budget sa joint venture agreement, P70 milyon pa lang ang nabuhian sa PrimeWater sulod sa lima ka tuig.
Miluwat usab kini, nga base sa gipakita nga feasibility study, aduna kini makadani nga mga saad apan kapakyasan lamang ang resulta ug gihulagway pa nga usa ka “scam.”