Gibutyagni Acting Chairperson Sen. Erwin Tulfo niadtong Sabado, Oktubre 11 nga ang Senate Blue Ribbon Committee magpdayun sa imbestigasyon kabahin sa multibillion-peso flood control corruption scandal pinaagi sa duha pa ka hearing sunod bulan.
Matod ni Tulfo, ang sunod hearing tentatibong ipahigayon sa Nobyembre 10, human sa bulan nga recess sa Senado, aron makapil ang mga senador nga kasamtangang anaa sa opisyal nga biyahe.
Human niini, magpagawas ang komite og partial committee report, unya magsugod usab og bag-ong imbestigasyon bahin sa gasto sa DPWH sa farm-to-market road (FMR) projects.
Dugang ni Tulfo nga iyang ipadayon ang imbestigasyon nga gisugdan ni kanhing Sen. Panfilo Lacson, lakip ang pagpatawag kang kanhing House Speaker Martin Romualdez ug ni Rep. Zaldy Co (Ako Bicol), nga nalambigit sa alegasyon sa kickbacks sa mga proyekto.
Si Senate President Vicente Sotto III mipakita og suporta, ug miluwat nga si Co mahimong pugson nga motunga ug posible nga arestohon tungod sa contempt kung padayon niyang likayan ang subpoena.
Samtang si Romualdez usab, imbitahan ubos sa inter-parliamentary courtesy.
Lakip niiini si Agriculture Secretary Francisco Tiu Laurel Jr. aron motubag sa report nga adunay mga overpriced nga DPWH farm-to-market road projects nga mikabat og P10 bilyon, matud pa naglakip sa Hi-Tone Construction, kompanya nga may kalabutan ni Co.
Gipasabot ni Tulfo nga ang papel sa Blue Ribbon Committee dili aron mapriso ang mga tawo, kundi aron maghimo og mga balaod nga makapugong sa mga opisyal nga abusuhon ang national budget.
Posibleng lakip sa ilang mga rekomendasyon ang permanenteng disqualification sa mga opisyal nga mapamatud-ang naghilabot o nagdivert sa pondo alang sa pulitikal nga katuyoan.
Giawhag usab ni Tulfo si Orly Guteza, ang security consultant ni Co nga miingon nga siya mismo ang nagdala og maletas nga puno og kwarta ngadto kang Romualdez ug Co, nga mobalik sa komite.
Samtang si Guteza gikataho nga nawala human sa iyang una nga testimonya.