Sa pagsaulog sa iyang ika-55 nga birthday karong Valentine’s Day, nipadayag si Kris Aquino sa iyang panghinaot nga makaabot pa og edad nga 60. Gawas sa pangandoy og taas nga kinabuhi, matod sa “Queen of All Media,” gusto niya nga makabaton og Senior Citizen card tungod kay mas dawat kini isip valid ID sa mga online establishments kaysa sa iyang PWD card.
Sa iyang health update, gibutyag ni Kris nga nakagawas na siya sa ospital human ang unom ka semana ug hinay-hinay na siyang makalakaw og iyaha (unaided). Gikatakda usab niya nga ilunsad ang iyang kaugalingong video podcast sa dili madugay. Mahitungod usab sa showbiz career sa iyang anak nga si Bimby, gipasalig ni Kris nga duna na kiniy sinaligan nga manager aron magpabilin siya isip usa ka inahan ug dili “mamager.”