Gisuspinde sa Senado ang pag-abante sa sugyot nga balaod nga maghatag og gahom ni Presidente Ferdinand Marcos Jr. sa pag-import og biofuel, bisan pa man sa pag-ila niini isip dinaliang prayoridad sa Malacañang.
Ang maong balaodnon nagtumong nga usbon ang Republic Act 9367 o ang Biofuels Act of 2006, nga nagmando sa paggamit og lokal nga biofuel sa tanang liquid fuels alang sa mga makina ug sakyanan sa nasud.
Gipadayag ni Senador Sherwin Gatchalian nga gikinahanglan ang mas masusing pagtuon sa maong kausaban sa Biofuel Act of 2006 tungod kay maapektuhan niini ang kapin sa 400,000 ka mga lokal nga mag-uuma sa lubi ug asukar nga maoy nag-unang supplier sa nasud.
Sa laing bahin, gibutyag usab ni Senador Juan Miguel Zubiri nga gikabalak-an sa mga senador ang posibleng maapektuhan nga industriya sa maong balaod.
Dugang pa niini, gikinahanglan usab nga tun-an kon makapakunhod sa presyo sa petrolyo ang pag-angkat og biofuel gikan sa gawas sa nasud.