Nakasinati og gamay nga pag-uswag ang halaga sa piso sa iyang pagtak-op sa trading niadtong Miyerkules (Abril 1, 2026), sa wala pa ang taas nga bakasyon alang sa Semana Santa.
Nagsira ang palitan sa P60.62 kada US dollar, nga mas taas og gamay kompara sa record low niini kagahapon nga P60.74.
Sumala sa mga market analyst, ang maong “pahulay” sa paghina sa piso tungod sa pag-abot sa mga remittances gikan sa mga Overseas Filipino Workers (OFWs) alang sa gasto sa ilang pamilya karong bakasyon. Dugang pa niini, duna usab gihimong interbensyon ang Bangko Sentral ng Pilipinas (BSP) aron mapugngan ang paspas nga pag-usos sa kwarta.
Bisan pa man niini, nagpabilin ang kabalaka sa mga negosyante tungod sa nagpadayong kagubot sa Middle East ug ang taas nga presyo sa lana nga posible gihapong makaapekto sa halaga sa piso kon mobalik na ang trading sa Lunes.