Sugod ugmang adlawa, Marso 3, 2026, laing bug-at nga pas-anon ang sugaton sa mga motorista ug konsumidor human gipatuman ang usa ka “big-time” nga pagsaka sa presyo sa lana sa tibuok nasod.
Sumala sa advisory gikan sa mga kompanya sa lana, mosaka og P1.90 ang matag litro sa gasolina, P1.20 sa diesel, ug P1.50 sa kerosene.
Kini na ang ika-10 nga sunod-sunod nga semana nga adunay usbaw sa diesel ug kerosene, samtang ika-8 na sab kini nga sunod-sunod nga pagsaka alang sa gasolina.
Sukad sa pagsugod niining tuiga, ang kinatibuk-ang saka sa presyo niabot na sa P4.80 sa gasolina, P8.20 sa diesel, ug P6.20 sa kerosene, diin ang maong pagsaka resulta sa nagkagrabe nga kagubot ug tensiyon karon sa Middle East.
Ang maong pagsaka sa presyo resulta sa nagkagrabe nga kagubot sa Middle East.
Niadtong niaging semana ang Estados Unidos ug Israel nagpahigayon og dagkong airstrikes sa Iran nga miresulta sa kamatayon ni Ayatollah Ali Khamenei, ang dugay na nga supreme leader sa Iran.
Isip balos, ang Iran nipahigayon usab og serye sa mga pagpamomba sa nagkalain-laing nasod sa Middle East nga dunay mga base militar sa US, lakip na ang Bahrain ug United Arab Emirates (UAE).
Tungod sa maong tensiyon, nabalaka ang merkado sa kalibutan sa suplay sa lana, hinungdan sa pagsaka sa presyo nga dako og epekto sa mga konsumidor dinhi sa Pilipinas.