Nalangan ang ikaduhang adlaw sa Bicameral Conference Committee meeting alang sa 2026 National Budget human mipatawag og miting ang Senado kagahapong adlaw sa buntag aron balikan ang pipila ka kwestiyonableng pondo nga naaprubahan sa miaging adlaw.
Lakip sa gipunting ang Medical Assistance to Indigent and Financially Incapacitated Patients (MAIFIP) nga giusab ang pondo gikan sa ₱29 bilyon ngadto sa ₱51 bilyon, bisan pa sa mga kabalaka nga kini mahimong magamit sa political patronage pinaagi sa pag-isyu og guarantee letters alang sa mga pasyente.
Usa usab sa giusisa ang ₱33 bilyong Farm-to-Market Road projects, nga giingong posible gihapon nga mahimong tinubdan sa korapsyon. Tungod sa nagpadayong diskusyon sa maong mga isyu, nalangan ang pagsugod sa Bicam meeting.
Gipatin-aw usab sa Department of Public Works and Highways Sec. Vince Dizon ang ilang baruganan sa mga infrastructure projects nga planong pondohan sa sunod tuig, ilabina sa paagi sa implementasyon ug sa gasto sa mga proyekto.Alas-4:49 sa hapon, nagpadayon pag-usab ang Bicam hearing.
Apan hangtod karon, wala pay gipadayag nga klarong resolusyon mahitungod sa MAIFIP ug Farm-to-Market Road projects. Padayon gihapon ang kabalaka nga ang maong mga pondo mahimong malambigit sa mga isyu sa korapsyon, ilabina sa nagpadayon pang kontrobersiya sa mga proyekto sa flood control ug kalsada.