Gipaambit sa content creator ug aktres nga si Bea Borres ang kabahin sa nasinatiang kalisod sa panahon sa iyang pagmabdos ug human manganak kon “postpartum struggles”. Gihulagway niini, isip labing delikado ug emosyonal nga hugna sa kinabuhi kinabuhi.
Sumala kang Bea, giisip niini ang kaugalingon nga usa sa mga swerti apan giangkon nga wala gihandom nga masinati sa bisan kinsa ang naagian nga mga pagsulay.
Gibutyag niini nga high-risk ang pagmabdos kaniadto ug hapit kining manganak nga wala sa oras, hinungdan nga kanunay kining ginamonitor sa mga doktor ug napugos pa nga kanselahon ang baby shower aron magpabiling ilawom sa istriktong pag-atiman medikal.
Human kini manganak kaniadtong Disyembre 15, 2025, nagpadayon ang kalisod gumikan ang anak nga si Baby Hope, nabilin sa Neonatal Intensive Care Unit sulod sa 44 ka adlaw ug nakagawas kaniadtng Enero 28, 2026.
Matud pa ni Bea, dako ang epekto niini sa mental ug emosyonal nga kahimtangan, ug pinaagi sa pagpaambit, gusto niining ipakita ang tinuod nga kahimtangan sa daghang inahan nga nag-antos og hilom nga mga kalisdanan atol sa pagmabdos ug postpartum.