Gipaningkamotan karon sa Dangcagan Municipal Police Station ang pagpangita sa inahan nga giingong posible nga misalikway sa bag-ong panganak nga batang babaye nga gibyaan sa usa ka seminteryo sa Dangcagan, Bukidnon.
Nahimong sentro sa lokal nga kabalaka ang insidente sa Old Cemetery sa maong lungsod pasado alas 3:00 sa hapon niadtong Hulyo 7, 2025, human makadungog og hilak ang usa ka concerned citizen ug nadiskobrehan ang bata nga gibutang sa sulod sa usa ka eco bag.
Dali kining gidala sa Rural Health Unit (RHU)-Dangcagan aron matabangan ug masiguro ang kahimtang sa panglawas sa bata. Gibana-banang bag-ong himugso pa ang bata ug wala pa’y klaro nga pagkatawo ang inahan nga nagbilin niini.
Gihimo na ang imbestigasyon ug posibleng pagsubay sa CCTV ug pag-imbestiga sa komunidad aron matumbok ang responsable. Gipahimangnoan sa kapulisan ang publiko nga motabang sa imbestigasyon pinaagi sa paghatag og kasayuran nga makapadali sa pagkilala sa inahan. Ang bata karon stable na ug ginatiman sa mga health worker sa RHU.