Gipasakaan na og kason murder ang usa ka Barangay Tanod nga mipusil-patay sa kaugalingong ig-agaw sa Sitio Migpait, Barangay Indulang, Talakag, Bukidnon.
Sumala sa eksklusibong pakighinabi sa Bombo Radyo Malaybalay kang PMSG. Denis M. Nacasabog sa Talakag Municipal Police Station, mitambong ang biktima sa usa ka kalihokan sa kasal sa paryente niini.
Atol sa maong kalihokan, gikaingong kalit nga mitunga ang biktima nga hubog ug wala tuyoa nga nasukahan ang nawong sa suspetsado samtang nag-inom.
Tungod sa gikaingong kaulaw, miuli ang suspetsado sa panimalay niini ug mikuha sa.45 caliber nga armas.
Sa pagbalik niini sa lugar, kalit na lamang gipusil ang biktima ug naigo sa likod nga bahin, tunga-tunga sa spinal cord, nga hinungdan sa dayong kamatayon niini.
Human sa insidente, dali nga miikyas ang suspetsado apan nadakpan ra usab kini sa kapulisan.
Kahinumodman nga nahitabo ang maong insidente kaaniadtong Domingo, Enero 25, 2026, pasado alas 3:35 sa kaadlawon.