Giaprobahan na sa House of Representatives sa ikaduhang pagbasa ang balaodnon nga nagtumong sa pagwagtang sa dugay na nga travel tax para sa mga pasahero nga mogawas sa nasud.
Tumong niini nga nga paubsan ang gasto sa pagbiyahe ug mas mapalig-on pa ang sektor sa turismo.
Ang House Bill No. 8464 o ang Travel Tax Abolition Act of 2026 gipasaka ni Representative Eleandro Jesus Madrona, ang chairman sa House Committee on Tourism.
Sumala pa niini, dako kini og tabang aron madasig ang mas daghang Pilipino sa pagbiyahe.
Ubos niini nga balaod, ang mga programa nga kaniadto gipondohan sa travel tax igahin na lamang alang sa General Appropriations Act.
Sa laing bahin, uyon usab si House Deputy Speaker Faustino “Bojie” Dy III nga rebisahon ang National Tax Allotment ubos sa Local Government Code of 1991.
Kini aron matabangan ang mga munisipyo sa ilang nagkadako nga responsibilidad, ilabi na human sa desisyon sa Korte Suprema sa Mandanas-Garcia Ruling.
Bisan kung misaka ang pondo sa mga lokal nga kagamhanan (LGU), nadugangan usab ang ilang mga trabaho ug obligasyon.
Gibutyag ni Dy nga kinahanglan adunay igong resources ang matag LGU aron mahatag ang saktong serbisyo ngadto sa publiko.