Giaprobahan na sa House of Representatives sa third and final reading ang House Bill Number 8418, nga naghatag og gahom kang Presidente Ferdinand Marcos Jr. sa temporaryong pagpakunhod o pagsuspenso sa excise tax sa mga produktong petrolyo kung duna’y krisis sa ekonomiya.
Ang maong balaodnon nakakuha og 247 ka affirmative, tulo ka negative, ug wala’y abstention.
Matod ni House Majority Leader Sandro Marcos, tumong niini ang paghatag og dinaliang tabang sa publiko batok sa pagsaka sa presyo sa lana sa world market nga nagpahinabo usab sa pagmahal sa pletehan, pagkaon, ug kuryente.
Ubos sa maong balaod, mahimong tangtangon sa Presidente ang hangtod 10 pesos matag litro sa excise tax sa gasolina ug 6 pesos sa diesel kon ang presyo sa krudo moabot o molapas sa 80 dolyares matag bariles.
Kini nga suspensyon mahimong molungtad og hangtod unom ka bulan ug magamit sa Presidente hangtod sa Disyembre 31, 2028.
Bisan pa man sa dakong suporta, ningsupak ang mga representante gikan sa Kabataan Party-list, Gabriela party-list, ug ACT Teachers Party-list, samtang ang Akbayan Party-list pinaagi ni Rep. Chel Diokno nipadayag og suporta apan nanawagan og mas halapad pa nga ayuda alang sa mga sektor nga labing naigo sa krisis.