Padayon nga nagkakusog ang Bagyong Uwan samtang naglihok kini padulong sa sidlakan nga bahin sa Philippine Sea atubangan sa Bicol Region. Posible kining mahimong super typhoon karong adlawa, sa dili pa kini mo-landfall sa Isabela o Aurora karung adlawa o sa buntag sa Nobyembre 10. Ang sentro sa bagyo anaa karon sa 575 kilometro sa sidlakan sa Catarman, Northern Samar o 620 kilometro sa sidlakan sa Virac, Catanduanes.
Nagdala kini ug kusog nga hangin nga 150 kilometro matag oras duol sa sentro, ug may paghuyop sa hangin nga moabot sa 185 kilometro matag oras. Naglihok kini pa-kasadpan-habagatang-kasadpan sa gikusgon nga 30 kilometro matag oras, samtang ang sirkulasyon sa hangin gikan sa bagyo mikabat na og 800 kilometro gikan sa mata sa bagyo.
Gipahibalo na ang Tropical Cyclone Wind Signal No. 3 sa Catanduanes, sidlakang bahin sa Camarines Sur, sidlakang bahin sa Albay, ug amihang-sidlakang bahin sa Sorsogon sa Luzon, ingon man sa amihang-sidlakang bahin sa Northern Samar sa Visayas.
Gibutang usab sa Signal No. 2 ang sidlakang bahin sa mainland Cagayan, Isabela, Quirino, Nueva Vizcaya, Aurora, Nueva Ecija, Bulacan, Metro Manila, Rizal, Laguna, Quezon, Marinduque, Camarines Norte, nahibilin nga bahin sa Camarines Sur, Albay, Sorsogon, Burias Island, ug Ticao Island sa Luzon; ug nahibilin nga bahin sa Northern Samar, amihang bahin sa Samar, ug amihang bahin sa Eastern Samar sa Visayas.
Samtang, Signal No. 1 ang gibutang sa Batanes, ubang bahin sa Cagayan lakip ang Babuyan Islands, Apayao, Abra, Kalinga, Mountain Province, Ifugao, Benguet, Ilocos Norte, Ilocos Sur, La Union, Pangasinan, Tarlac, Pampanga, Zambales, Bataan, Cavite, Batangas, ubang bahin sa Masbate, Romblon, Oriental Mindoro, Occidental Mindoro apil ang Lubang Islands, Calamian Islands, ug Cuyo Islands sa Luzon; ug ubang bahin sa Samar ug Eastern Samar, Biliran, Leyte, Southern Leyte, Bohol, amihan ug sentrong bahin sa Cebu, amihang bahin sa Negros Occidental ug Negros Oriental, Guimaras, Iloilo, Capiz, Aklan, ug Antique sa Visayas.
Sa Mindanao, apil sa mga maapektuhan ang Dinagat Islands, Surigao del Norte, amihang bahin sa Agusan del Norte, ug amihang bahin sa Surigao del Sur. Gipasidanan ang mga residente sa mga maong lugar nga mag-andam batok sa posibleng pagbaha, pagdahili sa yuta, ug kusog nga hangin. Gipasidan-an pag-usab sa Office of the Civil Defense ug National Disaster Risk Reduction and Management Council (NDRRMC) ang publiko kalabot sa umaabot nga Supertyphoon Uwan.