Misulod na sa Philippine Area of Responsibility (PAR) ang bagyong Uwan, sumala sa PAGASA. Matod sa ahensya, pasado alas 10 sa gabii adlawng Biyernes, Nobyembre 7, dihang nakasulod na sa PAR ang sentro sa maong bagyo. Ang Uwan adunay kusog nga hangin nga moabot sa 120 kilometro matag oras ug paghuros sa hangin na hangtod 150 kph, samtang nagalihok kini paingon sa kasadpan-habagatang kasadpan (west northwest) sa tulin nga 20 kph.
Gipaabot nga magsugod na ang mga pag-ulan sa daghang bahin sa nasud karong Sabado sa hapon, ning adlawa. Gipasidaan na sa state weather bureau ang mga residente nga nagpuyo sa baybayon ug mga lugar nga maagian sa baha nga maghimo og pre-emptive evacuation sa dili pa mokusog ang bagyong Uwan.
Sa press briefing sa Department of Science and Technology (DOST-PAGASA) kagahapong adlawa, gihangyo ni Administrator Nathaniel Servando ang publiko ug mga lokal nga pangagamhanan nga dili na maghulat nga masinati ang kusog nga hangin o ulan sa dili pa mobakwit.
Matod ni Servando, delikado nga bagyo ang Uwan tungod sa kusog nga hangin nga moabot 185 kph hangtod 195 kph ug lapad nga sirkulasyon nga molapad hangtod kapin 700 kilometro. Gidala niini ang kusog nga ulan, makadaot nga hangin, ug storm surge nga posibleng hinungdan sa grabe nga pagbaha, pagkahugno sa yuta, ug taas nga balod nga makaabot sa mga kabalayan.
Gipunting ni Servando nga taas ang hulga sa kinabuhi ug kabtangan, busa mas maayong mobakwit og sayo aron malikayan ang kadaot ug posibleng peligro sa kinabuhi. Gipasabot usab niya nga ang pag-andam ug pagbakwit daan mao’y yawe sa kaluwasan sa mga lugar nga maagian sa bagyo.
Samtang, si Meteorologist Benison Estareja, dako pa ang posibilidad nga molapad pa ang dapit nga maapektuhan sa bagyo, ug makaapekto pa kini sa Visayas samtang nagpadayon ang pagkakusog niini. Gisiguro sa PAGASA ang pagpagula sa tukma ug sakto sa oras nga impormasyon aron magiya ang publiko batok sa epekto sa bagyong Uwan.