Nasikop sa kapulisan sa Purok-1, Imbatug, Baungon Quezon, Bukidnon ang usa ka 34-anyos nga lalaki atol sa gipahigayong buy-bust operation niadtong milabay nga adlaw, alas 1:50 sa hapon.
Ang suspek, kinsa giila nga bag-ong drug personality sa maong dapit, nakuhaan og unom ka heat-sealed nga plastik nga sachet nga may sulod nga gituohang shabu. Gibana-bana nga motimbang kini og 0.6 gramos nga may standard drug price nga P4,080. Lakip usab nga nasakmit sa mga otoridad ang P500 nga marked money ug usa ka kaha sa sigarilyo nga gigamit isip sudlanan sa mga ilegal nga druga.
Kasamtangan na nga giandam ang pagpasaka og kaso batok sa suspek tungod sa paglapas sa Comprehensive Dangerous Drugs Act of 2002. Ang mga nakumpiskang ebidensya gidala na karon sa Bukidnon Provincial Forensic Unit alang sa tukmang eksaminasyon.