Girespondehan ni Sharon Pandong, bisita ug residente sa Barangay 1, Malaybalay City, ang usa ka bag-ong himugso nga batang babaye nga gikaingong gilabay sa Center for Ecological Development And Recreation kon CEDAR, Impalutao, Impasug-ong, Bukidnon.
Sumala kang Sharon, pasado 4:40 sa hapon, duna matud pa kini nadunggog nga balita nga adunay bata nakita ang mga nag-camping sa training center.
Dali kining miadto sa lokasyon ug nabantayan nga ang mga tawo nahadlok sa pagkuha sa maong bata busa nagbulontaryo kini nga kuhaon ug atimanon ang bata.
Matod pa ni Sharon, ang bag-ong gianak nga batang babaye duna pay inunlan ug pusod ug wala kini putos ug nakakulob kini ug gilamigas na atol sa pagrecue.
Dali kining gidala ni Sharon kauban ang pastor ug youth campers, ug gisakay sa multicab ni Dylan Taste, ngadto sa RHU-Impasugong. Duna usab nitanyag sa paghatag ug gatas nga usa sab ka inahan nga giilang si Rhea Jane Donasco gumikan nalooy matod pa kini sa bata.
Kasamtangan nagpaalim ang 2.2kls nga bag-ong gianak nga batang babaye sa Bukidnon Provincial Hospital.
Dugang pa niini, sa wala pa makit-i ang bata, duna matud pay nakakita nga grupo sa kabatan-unan sa buntag nga dunay pula nga sakyanan nga wigo ang nagparking sa kakahuyan nga bahin sa entrada sa CEDAR ug dunay lalaki nga migawas sa maong sakyanan nga miadto sa kakahoyan.
Padayon pa ang mga otoridad sa pagsuta og kinsa ang naglabay sa maong bata.