Balhogl na karon sa selda sa kapulisan ang usa ka 40-anyos nga lalaki human kini nasikop sa gihimong drug buy-bust operation sa Purok 4, Barangay Alae, Manolo Fortich, Bukidnon, niadtong milabayng adlaw, ( Abril 1, 2026 ), pasado alas-7:31 sa gabii.
Ang suspetsado, kinsa usa ka residente sa Zone 1 sa maong barangay, giilang usa ka “newly identified drug personality” sa dapit. Nasakmit gikan sa iyang posisyon ang duha ka pakete sa gituohang shabu nga adunay gibug-aton nga 0.76 gramos ug gibana-banang mobalor og ₱5,168.
Base sa report sa Manolo Fortich Municipal Police Station, gawas sa ilegal nga droga, narekober usab gikan sa suspetsado ang usa ka yunit sa cellphone, lighter, Berocca canister, usa ka itom nga sling bag, ug ang ₱1,000 nga buy-bust money.
Sa pagkakaron, ang dinakpan anaa na sa kustodiya sa kapulisan alang sa saktong dokumentasyon. Giandam na usab ang kasong paglapas sa Sections 5 ug 11, Article II sa Republic Act 9165 o ang Comprehensive Dangerous Drugs Act of 2002 batok sa maong suspetsado.