Giklaro ni Bae Inatlawan Adelina Dosinos Tarino Ganahon, usa ka respetadong ritualist sa Bukidnon, nga ang mga nakitang “tilimad-on” atol sa sagradong ritwal sa pagbukas sa Kaamulan Festival 2026 sa Bukidnon dili angay kabalak-an.
Matud niini, kini nagkonekta lamang sa kalibutan-ong tilimadnon ug dili kini nagpasabot og dautang panghitabo.
Gipasabot ni Bae Inatlawan, nga ang pamahayag ni Datu Amay Iwag Linsahay, Municipal Chieftain sa Talaandig Tribe sa Manolo Fortich, kabahin sa obserbasyon sa tilimad-on nga adunay kalabutan sa sitwasyon sa gyera sa Middle East, diin gipanghinaot nga dili kini makaapekto sa Pilipinas.
Lakip sa ritwal ang “Pamukalag Ha Pangampo”, nga naglangkob sa kinatibuk-ang panalangin alang sa tibuok katawhan, selebrasyon, ug sa probinsya sa Bukidnon.
Matud pa ni Bae Inatlawan, gipaniguro niini nga ang tanang ritwal hapsay ug wala’y kalapasan aron malikayan ang kaguliang ug masiguro ang kalinaw ug kaayohan sa tibuok selebrasyon.
Dugang pa niini, nga ang maong ritwal nagpunting sa espiritwal nga panaghiusa sa pito ka tribu sa Bukidnon, ug sa paghatag pasidungog sa kultura ug tradisyon nga nagpalig-on sa identidad sa probinsya.