Gitugutan sa usa ka hukmanan sa Turkey ang usa ka babaye nga makigbulag sa iyang bana human mapamatud-an nga ang lalaki nag-“like” og mga malisyosong hulagway sa laing babaye sa social media.
Gisang-at ang kaso sa syudad sa Kayseri diin giakusahan sa babaye ang iyang bana sa verbal nga pagpakaulaw, sobra nga pag-gahin og oras sa social media, ug pag-“like” sa mga hulagway sa ubang babaye.
Pinaagi sa iyang abogado, nangayo usab kini og kompensasyon tungod sa giingong paglapas sa marital loyalty o katungdanan sa pagkamatinud-anon sa kaminyoon.
Gihimakak sa bana ang mga akusasyon ug misaka usab og diborsiyo, apan sa desisyon sa hukmanan, mas napamatud-an nga adunay dakong sala ang lalaki.
Gimando sa korte nga mobayad ang bana og 750 Turkish lira matag bulan isip alimony, ug $2,000 isip kompensasyon sa asawa.
Dugang sa korte, ang pag-“like” sa hulagway sa laing babaye nakadaot sa pagsalig sulod sa relasyon ug mahimo kining mahimong basehan sa susamang mga kaso sa diborsiyo sa Turkey sa umaabot pa nga henerasyon.