Gidepensahan ni lead defense lawyer Nicholas Kaufman si kanhing Pangulong Rodrigo Duterte kalabot sa mga namatayi sa giingong “armed confrontations” sa kampanya batok sa iligal nga droga.
Gipangatarungan sa defense counsel nga gihimo sa police force ang maong mga aksyon isip tubag sa hulga sa ilang kinabuhi subay sa rules of engagement nga makadaghan nang gipahayag sa kanhing pangulo.
Sumala ni Kaufman, adunay existing contemporaneous documents sama sa arrest warrants, operational records ug mga narekober nga armas nga nagpakita nga lehitimo ang mga operasyon sa kapulisan nga miresulta sa pinusilay.
“The general record does not substantiate a theory of wanting execution, yet prosecution seeks to rely once again on the testimony of criminals,” sumala ni Kaufman.
Matod pa ni Kaufman, ang mga armas nga narekober sa crime scene nagpakita nga gigamit kini batok sa mga pulis nga maoy hinungdan sa paggamit usab og pwersa sa kapulisan.
Dugang pa niini, nga awtorisado ang mga operasyon pinaagi sa mga search warrant nga gi-isyu sa korte.
“Those circumstances are squarely within operational legality and fundamentally incompatible with the pre-planned murder,” matud ni Kaufman.
Gihisgutan usab ni Kaufman ang upat ka indibidwal nga nadakpan nga buhi, nga nagpakita, matod niya, nga walay paggamit og “indiscriminate force.”
Gikutlo usab niya ang usa ka insidente diin adunay gunpowder residue nga nadetek sa kamot sa biktima nga nagtugma sa forensic findings nga nagpakita og pinusilay ug supak sa giingong “straightforward execution” narrative.
Sumla ni Kaufman nga napakyas ang Prosekusyon sa pagpamatuod nga “planted” ang droga ug mga armas sa mga biktima, ug ilang gisalikway ang mga ebidensiya gikan sa crime scene samtang nangatarungan nga walay igo nga basehan.
Gisupak usab ni Kaufman ang pagsalig sa Prosekusyon sa “narrow” ug “uncorroborated” insider testimony nga nagaingon nga gitanom lamang ang armas sa crime scene ug giimbento ang opisyal nga report.
Apan, sumala kang Kaufman, adunay usa ka testigo nga miangkon nga wala niya personal nga nasaksihan ang pagtanom sa armas.
Gihisgutan usab sa abogado ang usa ka insidente nga naglambigit matud pa sa kanhing pangulo base sa voice recognition sa usa ka indibidwal nga miingon nga nakadungog siya og phone conversation ug nailhan ang tingog sa kanhing pangulo.
“Voice recognition in uncontrolled conditions while physically moved and uncorroborated by any forensic or documentary evidence cannot constitute substantial ground for confirmation,” matod sa defense counsel.