Dili tubag ang anti-political dynasty nga balaod isip kasulbaran o tubag sa dakong problema sa korapsyon nga giatubgang sa nasud sa Pilipinas.
Gipahimangnoan sa usa sa ka legal expert nga si Atty. Oscar S. Moreno, ang katawhan mahitungod sa gahom isip mga botante taliwala sa isyu sa political dynasties sa nasud.
Sa iyang pamahayag, gipasabot ni Moreno nga wala sa political dynasty ang solusyon sa mga problema sa gobyerno tungod ang katawhan ang nagbuot pinaagi sa ilang mga boto.
Apan, subo niyang gibutyag niini nga sa dihang moabot na ang panahon sa piniliay, daghan sa mga katawhan ang mabaligya ang ilang mga boto, hinungdan nga makalimtan na ang tinuod nga katuyoan ug kahulugan sa anti-dynasty bill.
Matud pa ni Moreno, angay masabtan sa matag usa ang usa ka batakang prinsipyo nga ang soberanya anaa sa katawhan ug ang tanang awtoridad sa gobyerno naggikan kanila.
Gihimug-atan usab niini nga ang mga opisyales sa gobyerno, bisan unsa pa ang ilang posisyon, mga suluguon lamang sa katawhan ug dili angay kalimtan ang ilang obligasyon sa pagserbisyo sa publiko.