Gipasigarbo sa Bukidnon State University community ug sa tibuok lalawigan sa Bukidnon ang kalampusan ni Atty. Gerilin A. Gascon, usa ka anak sa mag-uuma nga niranggo ika-14th sa 2025 Philippine Bar Examination.
Sa eksklusibong pakighinabi sa Bombo Radyo Malaybalay kang Atty. Gascon, gipadayag niini ang pasalamat sa mga scholarship sa gobyerno nga nahimong hinungdan aron kini makahuman sa pagkat-on gikan elementarya hangtod kolehiyo, lakip ang kursong Accountancy sa Central Mindanao University, sa wala pa mosunod sa dalan sa abogasya.
Matud pa niini, dako ang papel sa pag-ampo ug lig-on nga pagsalig sa Ginoo sa bar examination journey, hilabi na sa mga higayon sa kakapoy ug pagsulay.
Mihatag usab kini og mensahe sa mga napakyas sa mga tinguha, nga ang kapakyasan dili sukdanan sa pagkatao, ug nga ang pag-atubang sa usa ka lisod nga eksaminasyon sama sa Bar Exam usa na ka dakong kalampusan.