Anaa na sa kustodiya sa Malaybalay City Police Station ang suspetsado sa pagpatay sa tulo ka miyembro sa iyang pamilya. Giila ang dinakpan nga si John Kyler Andohon, residente sa Purok 11, Barangay Managok, dakbayan sa Malaybalay.
Matod ni PCOL Jovit Culaway, Provincial Director sa Bukidnon Police Provincial Office, atol sa press briefing, personal ang motibo sa suspetsado sa maong krimen. Lig-on usab ang ebidensya batok kang John Kyler, lakip na ang mga testimonya sa mga saksi ug ang physical evidence nga nagtugma sa nahitabong krimen.
Base sa imbestigasyon sa kapulisan, dugay nang gi plano sa suspetsado ang pagpatay sa iyang pamilya ug nag-inusara lang kini sa pagbuhat niini.
Nag-atubang karon ang suspetsado sa duha ka kaso sa parricide ug usa ka kaso sa murder diin wala’y girekomendang pyansa.
Kahinumduman nga niadtong Mayo 21 ning tuiga, nahitabo ang insidente sa ilang panimalay diin gipangluba ug gipamatay sa suspetsado ang iyang amahan nga si Jovanie Andohon inahan nga si Evangeline Andohon, ug igsuon nga menor de edad.
Sa laing bahin ang duha ka menor de edad nga mga igsoon sa suspetsado anaa na sa buhatan sa Deparment of Social Welfare and Development (DSWD).