Gikabalak-an sa usa ka amahan sa Taiwan nga dili na masundan ang ilang kaliwat, busa nagtanyag kini og ganti nga 38,000 New Taiwan Dollars o mokabat sa P66,000 alang sa kinsa ang makakita og pangasaw-unon sa iyang 40-anyos nga anak.
Ang maong anunsiyo gipaskil sa pulang papel sa gawas sa ilang balay sa Tainan City human ang ikaduhang anak niini namatay sa usa ka aksidente walo ka tuig na ang milabay.
Lakip sa mga hiyas nga gipangita sa amahan mao ang usa ka babaye nga maanyag, buotan, ug dili molapas sa 35-anyos ang panuigon aron masiguro makahimo pa kini nga makapanganak.
Samtang ang anak nga nagtrabaho sa industriya sa automotive parts nagpabiling kalmado ug nagsalig na lamang matud pa sa gitawag nga “tadhana”, nga maong karaan nga pamaagi sa pagpangita og asawa, diin nahimo na karong init nga hisgutanan sa komunidad ug sa social media.