Nanawagan ang amahan ni Rick Rio Donceras Arguilles nga si Ronie Tanso Arguilles, 48 anyos, residente sa Brgy. Amoyong, Wao, Lanao del Sur, sa publiko alang sa tabang sa pagpangita sa iyang anak diin gitaho nga nawala.
Gisaysay niini ngadto sa Maramag Municipal Police Station (MPS) kaniadtong Septiyembre 18, 2025, ang iyang anak nga si Rick Rio, 21 anyos ug estudyante sa Philippine Countryville College (PCC), wala na makit-i sukad alas-12:00 sa udto sa Septiyembre 16, 2025. Katapusang nakit-an kini sa Crossing Crystal, North Poblacion, Maramag, Bukidnon.
Matud pa sa manghud nga babaye sa biktima, mihulog si Rick og ₱60,000 nga gigahin alang sa acquaintance party sa eskuylahan diin siya nagserbisyo isip Vice-Governor for Finance.
Katapusang namat-an ang biktima nga nagsakay sa iyang pula ug puti nga motorsiklo sa may Purok 2, North Poblacion, Maramag.
Sa pagkakaron, padayon ang Maramag MPS sa paghatag og tabang ug koordinasyon sa pamilya aron sa dali nga pagpangita sa nawala nga biktima.