Posibleng musangpot sa kapildihan ang bisan unsang alyansa sa kampo sa oposisyon uban sa administrasyon ni Presidente Ferdinand Marcos Jr. alang sa 2028 elections tungod sa nagkagrabe nga kalisud sa ekonomiya sa nasud.
Kini ang gibutyag ni Atty. Tony Laviña, usa ka international lawyer, atol sa exclusibong pakighinabi sa Bombo Radyo, Matud pa niini mahimong unpopular si Marcos sa tuig 2028 tungod sa padayong pagsaka sa presyo sa mga palaliton.
Gipasabot ni Atty. Laviña nga dili maayo alang sa mga progresibong pundok sama sa Liberal Party, Akbayan, ug Makabayan nga makig-alyansa sa mga pwersa ni Marcos bisan pa man sa tinguha niini nga mapildi si Bise Presidente Sara Duterte.
Saysay pa niini ang bisan kinsang pundok nga makig-alyansa sa administrasyon madamay sa negatibong imahe niini sa umaabot nga katuigan.
Gihisgutan usab sa abogado ang tensyon sa West Philippine Sea (WPS), diin iyang gikuwestiyon ang baruganan ni Sen. Rodante Marcoleta nga daw nagdepensa sa China taliwala sa mga insulto niini sa Pilipinas.
Gihulagway ni Atty. Laviña nga “fake news” ang pipila ka mga impormasyon nga gipakaylap bahin sa WPS ug nanawagan kini og “re-education” alang sa tanan.Gihagit usab niini ang mga magbabalaod nga mubisita sa maong mga isla aron personal nga makita ang kamatuoran sa teritoryo sa nasud.