Gilaoman karon sa mga ekonomista nga dako ang mahatag nga tabang sa pagbawi sa ekonomiya sa Rehiyon 10 ang pagbukas sa Bukidnon–Davao access road nga nahimutang sa Sitio Kipolot, Barangay Palacapao, Quezon, Bukidnon.
Sa eksklusibong pakighinabi sa Bombo Radyo Malaybalay kang Ray Talimio Jr., kanhi miyembro sa Economic Development Committee sa Regional Development Council–Region 10 ug representante sa Oro Chamber, gipadayag niini nga tungod nakab-ot na sa rehiyon ang gitawag nga trillion-peso economy, mas dako ang posibilidad nga madani ang mga lokal ug langyaw nga investors hilabi na sa pagbukas sa access road.
Matud niini, nga ang pagkahugno ug temporaryong pagsira sa Bukidnon–Davao access road kaniadto adunay direktang epekto sa ekonomiya sa Rehiyon 10, hilabi na sa kontribusyon niini sa Gross Regional Domestic Product kon GRDP.
Gibanabanang moabot sa 1.9 porsiyento ang nawala sa kontribusyon sa rehiyon sa GRDP tungod sa kahimtangan sa dalan, hinungdan nga mipahinay sa paglihok sa mga produkto, serbisyo ug turismo.
Bisan pa niini, gilaoman nga karong tuig 2026 hingpit nga makarekober ang Rehiyon 10. Apan sa personal nga obserbasyon ni Talimio, makita niini ang kakulangon sa kalig-on ug kalidad sa pagkahimo niini.
Bisan pa sa mga kakulangon, gituohan gihapon nga dako ang potensyal nga mosaka ang engagement sa tourism activities sa lugar, lakip na ang eco-tourism ug agri-tourism, gawas pa sa naandan nga kalihokan sa negosyo ug komersyo.