Nakab-ot sa garbo sa nasud nga si Alex Eala ang iyang pinakataas nga ranggo sa kalibutan human kini nisaka ngadto sa ika-49 nga dapit sa pinakabag-ong Women’s Tennis Association (WTA) rankings.
Nisaka og upat ka ang-ang ang 20-anyos nga Filipina tennis star human sa iyang talagsaong gipakita nga abilidad sa bag-o lang nahuman nga WTA 250 ASB Classic 2026 didto sa Auckland, New Zealand. Kahinumduman nga nilampos si Eala sa pagsulod sa semifinals sa parehong singles ug doubles events sa maong torneyo.
Tungod niini, si Eala opisyal na nga nalakip sa “Top 50” sa tibuok kalibutan, usa ka dakong kasaysayan alang sa Philippine tennis.
Human sa iyang kalampusan sa New Zealand, wala’y hunong ang dula sa batan-ong atleta. Sunod nga sagubangon ni Eala ang usa ka exhibition tournament—ang Kooyong Classic—didto sa Melbourne, Australia, nga sugdan karong adlawa, Enero 13 hangtod 15.
Kini nga torneyo nagsilbi usab nga preparasyon ni Eala sa dili pa ang mas dagkong kompetisyon sa tennis karong tuiga.