Nangandam na karon ang Pinay tennis star nga si Alex Eala alang sa mosunod nga torneo nga iyang pagasalmutan sa sunod nga bulan.
Human sa iyang Round of 16 exit sa Miami Open, sunod nga pakigbatokan ni Eala ang clay court sa 2026 Upper Austria Ladies Linz Open. Ang maong torneo gikatakda nga magsugod karong Abril 6 hangtod 12, diin dulaon kini sa indoor clay court sa Design Center Linz.
Nalakip ang 20-anyos nga si Eala sa listahan sa mga partisipante niining WTA 500 tournament uban ang pipila ka mga sikat nga pangalan sa kalibutan sa tennis. Lakip sa iyang mga posibleng makaatbang mao sila si defending champion Katerina Alexandrova, Clara Tauson, Emma Raducanu, Emma Navarro, Jelena Ostapenko, ug Sorana Cirstea.
Sa pagkakaron, gipunting na ni Eala ang iyang panahon sa hugot nga ensayo aron masiguro ang maayong performance sa maong kompetisyon sa Austria.