Gikatakdang mahimong busy ang bulan sa Abril alang sa Filipina tennis star nga si Alex Eala tungod sa sunod-sunod nga mga clay court tournament nga iyang salmutan.
Sugdan ni Eala ang iyang kampanya sa iyang debut sa Linz Open nga ipahigayon karong Abril 6 hangtod 12 didto sa Austria. Lakip ang Pinay netter sa main draw sa torneyo uban ang siyam ka laing mga magdudula nga anaa sa WTA Top 40.
Base sa datus niadtong Sabado, nalakip usab si Eala sa qualifying draw sa 2026 Porsche Tennis Grand Prix nga gikatakda sa Abril 13 hangtod 19 didto sa Stuttgart, Germany.
Gawas niini, anaa usab ang ngalan ni Eala sa player list alang sa Mutua Madrid Open nga dulaon sugod sa Abril 21 hangtod Mayo 3. Hinuon, mahimo pa kining mausab depende sa tournament draw sa Stuttgart ug Madrid.
Kini nga mga kalihokan nagsunod sa nindot nga kampanya ni Eala sa 2026 Miami Open diin malampuson siyang nakaabot sa fourth round.