Hingpit nang mikanaug ang world ranking sa Filipina tennis player nga si Alex Eala human sa iyang pagkapakyas sa Round of 16 sa Miami Open 2026.
Wala molampus ang Pinay star sa pag-usab o paglabaw sa iyang semifinal appearance niadtong 2025, hinungdan nga nawala ang iyang mga puntos nga nakatabang unta sa iyang ranking. Miabot ngadto sa 270 ka puntos ang nawala kaniya tungod niini.
Base sa opisyal nga singles ranking sa Women’s Tennis Association (WTA) niadtong Marso 30, anaa na karon si Eala sa rank No. 45. Mas ubos kini og 16 ka ang-ang gikan sa iyang career-high nga No. 29 nga naabot niya duha pa lang ka semana ang milabay.
Giisip kini nga labing dako nga pagkunhod sa WTA rankings karong semanaha.
Gilauman nga mobalik og serye sa mga kompetisyon si Eala alang sa Clay Season sugod karong Abril, diin gipaabot nga makabawi siya ug mopausbaw pag-usab sa iyang world ranking.