Gipasalig sa Armed Forces of the Philippines kon AFP nga wala’y makitang hulga sa pag-atake sa Iran batok sa Pilipinas, taliwala sa nagkagrabeng tensyon sa Middle East.
Matud ni Rear Admiral Roy Vincent Trinidad, tigpamaba sa Philippine Navy, ang range sa missile system sa Iran limitado sa gibana-bana nga 2,000 kilometros. Dugang pa, nga mga 7,500 kilometros ang gilay-on sa Pilipinas gikan sa Iran, hinungdan nga dili klaro kung makaabot ba kini sa Pilipinas.
Dugang pa ni Trinidad, nga bisan ang strategic US-UK military base nga Diego Garcia sa Indian Ocean dili maabot sa capability sa missile sa Iran.
Giklaro usab sa AFP, nga ang mga lugar nga sakop sa Enhanced Defense Cooperation Agreement kon EDCA mao ang mga pasilidad nga gipanag-iyahan sa Pilipinas ug dili mga base militar sa Estados Unidos.
Gigamit kini alang sa humanitarian assistance, disaster response, ug hiniusang pagbansay sa mga kaalyado nga nasud, ug dili isip mga opensiba nga pag-atake.
Kahinumdoman nga adunay mga taho nga ang mga site sa EDCA mahimong target sa Iran kung ang panagbangi tali sa Iran, Estados Unidos, ug Israel modako o mulala pa.
Apan, ang AFP kusganong mipadayag nga ang kasamtangang panagbangi usa ka rehiyonal nga isyu sa Middle East ug nga ang Pilipinas wala malakip isip proxy sa panagbangi.
Nanawagan usab ang militar sa publiko nga magpabiling kalmado, mahimong kritikal sa impormasyon, ug magsalig lamang sa mga opisyal nga pamahayag sa gobyerno.